FORENSIC MEDICINE

مشاركات: 11504
اشترك في: الخميس إبريل 04, 2013 10:28 pm

FORENSIC MEDICINE

مشاركةبواسطة دكتور كمال سيد » الأحد إبريل 14, 2013 5:49 pm

الطب الشــــرعى

هى مــادة شيـــقـــة جــدااا ...و تنقسم الى جزئين
شرعى
وده بندرس فيه علامات الوفاة والتغيرات اللى بتحصل بعد الوفاة .. انواع الجروح والكدمات ...
وجميع ما يتعلق بالقضايا الجنائية زى الانتحار والقتل ازاى نفرق بينهم فى حالة الطلق النارى والاختناق وحالة الاحتراق والغرق .. وهكذا

توكسو
وهى جزء يتعلق بالتسمم بالمواد الكيميائية المختلفة سواء سائلة او غازية سواء كانت مواد تستخدم فى الحياة اليومية او التسمم بالادوية

وما يتعلق بالموضوعات دى فى العملى :-
بينقسم لجزئين
المتحف
اللاب
المتحف طبعا فيه الجارات زى الباثولوجى كده
واللاب بيبقى مرة واحدة فى الراوند وبيبقى فيه ازاى اتعرف على انواع البصمة واحدد السن من الاكس راى او من بصمة الاسنان
وكمان فيه شوية سلايدز كده لها علاقة بالشرعى

نظام الراوند:-
مدة الراوند .زى الباقى 7 اسابيع والامتحان بيبقى فى نص الثامن
راوند الفورنسيك تانى اسهل راوند بعد الاى ان تى ... لان نظامه
داخل الراوند بيتم تقسيم الطلبة الى
اربعه مجموعات
A1 , A2 , B1 , B2

عدد الجروب فى الراوند بيكون تقريبا 250 طالب بيتقسموا لاربع مجموعات حسب ترتيب ارقامهم الجدول بينزل فى اول اسبوع فى الراوند فيه توزيعه الارقام على المجموعات بتاعتهم

وهى توزيعه للنظام ليس اكثر وبتفضل ثابته لاخر الراوند

وكل واحد بيعرف ان عنده يومين فى الاسبوع سكشن عملى ويومين توتوريال

جزء السكشن :- بيتشرح فيه العملى وبيشرحه مدرس مرتين فى الاسبوع

جزء التيتوريال :- بيتشرح فيه حاجات نظرى اكتر وبيشرحها استاذ او استاذ مساعد من القسم مرتين فى الاسبوع برده
غالبا بيبقى كل يوم فى حاجة بس ينفع تظبطهم ع بعض بحيث تنزلوا يومين بس
يوم الاربعاء اجااااااازة فى قسم الفورنسيك

عيوب الراوند:- ماظنش ان له اى عيوب ... غير ان التوتوريال لا يختلف عن المحاضرة كثيرا

مميزاته : هيخليك تبقى ماشى مع المادة اول باول وممكن تتابع معاه النظرى كمان لان فيه حاجات بتتشرح فى العملى بس مش فى المحاضرات بالاضافة انك هتلم العملى اول باول

المحاضرات :

عندك اربع محاضرات فى الاسبوع الساعه 12 ... مدتها تقريبا ساعتين

مميزات المحاضرة : هتمشى مع المادة واحدة واحدة وهتلم نفسك اول باول خصوصا لو مش هتسمع شرايط ولا هتاخد دروس بالاضافة لتنبيهات الدكاترة على النقط اللى بتوقع فى الامتحانات

عيوب المحاضرة : بيمشوا بسرعه الصاروخ ... يعنى لو عديت يوم ولا اتنين من غير ما تزاكر اللى اخدته هتيأس ونفساويتك هتتعب وهتلاقى نفسك اتاخرت جدا

الخلاصة بالنسبه للحضور : لا فيه شوك فى المحاضرة ولا اى حاجة ... يعنى لو عايز تغيب براحتك بس لو مش بتسمع

شرايط يبقى لازم تحضر المحاضرات ... خصوصا ان الدكاترة شرحهم تحفة بجد وهتفهم منهم كويس اوى

الكتب

النظرى :

1- كتاب القسم
كتابين للشرعى والسموم

مميزاته : كتاب رائع ومنظم ولسه جديد ومفيش اى سورس تانى للمزاكرة ... واللى مش بيزاكر منه بيضيع النظرى

عيوبه : عيوب قليلة جدا زى اى كتاب قسم

2- ملازم مداد تلات ملازم للشرعى والسموم
مميزات:- مهمين لسماع التسجيلات ..
عيوب :-ناقصين عن كتاب القسم
العملى :
1- كتاب الاطلس

دة كتاب القسم فيه كل ما يهمك عن العملى والصور بتاعته بس ناقص فى الكومنت بتاع الجارات ودة
عمل ازمة فى امتحان العملى شوية
2- ملزمة مداد للعملى
كامله من مجاميعه .. يعنى تغنيك عن اى حاجة مع كتاب الاطلس
ملحوظة
الكتب اللى هتشتريها مجموعة كتب القسم " كتابين نظرى وكتاب اطلس ب 80 جنيه

وفى كتاب اسئلة للقسم برده ب 30 جنية ... ده مهم جدا من حيث التطبيق على الاسئلة ونامها علشان الامتحانات

الدرجات :-

المادة ككل من مجموع 200 درجة
- 70 درجة اندراوند ... وده بيبقى متقسم بين امتحان الاندراوند والغياب والشوك والبحث والعملى...

امتحان الشوك:- 10 درجات , دكتورة اسامه الباراني هيقولكم معاده قبلها باسبوع وبتحدد فيه 4 شباتر من كتاب الفورنسك بس
مش شوك زى باقى الشوكات .... يعنى ما تتخيلش انك هتعرف تغش كلمه واحدة امتحان

عملى الفاينال:- كل سنة بيكون فى اخر السنة السنة دى هو فى اخر كل راوند , بيكون على الجارات والسلايدز وعينات التوكسو

امتحان الاندراوند:- 25 درجة دكتور دينا بتحدد فيه 8 شباتر بيبقى منهم 2 او 3 توكسو والباقى فورنسيك

- 100 درجة نظرى آخر العام

- 30 درجة شفوى وبتبقى لجنتين واحدة شرعى والتانية توكسو


ملحوظه مع ان د- اسامه بئه رئيس القسم السنه اللي فاتت الا ان دكتوره دينا

كان ليها سيطره قويه وحطة لينا امتحان اخر السنه والراوند

كنا مبسوطين جدا

الدروس :-
اكتر حد كان مشهور فى الدروس دكتور شيرين ... بس هى للاسف بطلت تدى دروس من اول السنة دى
بس طبعا تسجيلات الدروس موجودة ع النت
هى ميزة دكتور شيرين انها بتقول حاجات تحفظ بها وخاصة التوكسو ... الحاجات دى بتسهل كتير لان طبعا التوكسو فى حاجات كتير متشابهة

فى برده دكتور خالد ع ما اعتقد
وفى دكتور عدلى كمان

طريقة المذاكرة:-
افضل طريقة للمذاكرة هى سماع تسجيلات الدرس والمذاكرة وراه على طول .. ده بيساعد فى تثبيت المعلومة جدااا

هل ممكن اذاكر حاجة تانية جنب الفورنسيك فى الراوند!!
فيه تلات طرق اختار الطريق اللى هتقدر عليه ولكن اولا واخيرا الشرعى لازم يكون رقم واحد

الطريق الاول
تذاكر مادة مع الشرعى يوم بيوم
دة لو كنت بتحب تنوع فى المزاكرة
احنا قولنا هتمشى بمعدل عشر صفحات كل يوم تسمعهم وتذاكرهم سماع العشر صفحات فى الشرايط هياخد متوسط ساعه ونص الى ساعتين حسب اهميه الجزئية اللى الدكتورة بتشرحها وبتطول فيها ولا لا وقول هتذاكرهم فى ساعه ونص زيهم يعنى تلات ساعات فى اليوم لو بعدها لقيت نفسك قادر تذاكر تانى يبقى ذاكر اى مادة تحبها

الطريق التانى

تقسيم الايام بين الشرعى ومادة تانية
دة لو انت مش بتزهق انك تذاكر كام يوم ورا بعض نفس المادة
انك تعمل اربع ايام لمذاكرة الشرعى بس ساعتها هتزود معدل اللى بتسمعه بدل شرح عشر صفحات هيبقى 12 صفحة مثلا عشان تعوض وتخلى تلات ايام لمذاكرة اى مادة تانية دة لو انت بتحب تركز يومك فى مادة واحدة بس

الطريق التالت
لو كنت مش هتعرف تعمل دة ولا دة
نصيحة بلاش تشغل نفسك ساعتها غير بالشرعى عشان تبقى عالاقل ضمنت انك خلصت مادة فى الراوند بتاعها كامله

فأنصحكم بالاتى :

1- بالنسبه للحضور :
لو هتسمع شرايط يبقى سيبك من المحاضرات ووفر وقتها لو مش هتسمع شرايط يبقى لازم لازم لازم تحضر محاضرات وهتستفيد منها جدا

2- بالنسبه لمذاكرة النظرى :

حضرتك هتجيب ملزمة مداد للشرعى وملزمة مداد فى السموم وهتسمع الشرايط وانت بتبص فيها ... لان الشرايط ماشية بنفس الترتيب بتاع الملازم وهتحس بتوهان لو سمعت الشرايط مع كتاب القسم بعد ما تسمع شريط تزاكره من كتاب القسم مش من الملزمة يعنى كل دور الملزمة انك تبص فيها وانت بتسمع الشريط عشان تفهم والمذاكرة من كتاب القسم فقط لا غير

3- سماع الشرايط :

اياك تسمع شرايط كتير من غير ما تذاكرها ... يعنى تسمع شريط واحد وتذاكره وبعدها تسمع اللى بعده عشان هتلاقى الدنيا اتكومت عليك وشبه بعضها اوى وهتكره الشرعى

4- بالنسبه للعملى :

على اخر اسبوعين فى الراوند حاول تدخل المتحف عالاقل مرتين تلاتة .... عشان تحفظ شكل الجارات ومذاكرة العملى خليها لاخر اسبوعين فى العملى بردة عشان تبقى ماشى على سكيم سهل وثابت ومش تلخبط نفسك ويكفيك ملزمة مداد للعملى مع كتاب الاطلس عشان تشوف منه اللى بتذاكره

5- تقسيم الوقت بين العملى والنظرى

حاول فى اول شهر ونص تكون خلصت النظرى لانه كتير " حوالى 310 صفحة "
لانه مش كبير ويتلم بسرعه

وفى اخر اسبوعين فقط تبدأ تذاكر العملى

6- لو الوقت زنقك فى اخر الراوند

يبقى الاولى هو العملى ... ثم المطلوب فى امتحان الاند راوند عشان مش تضيع 55 درجة من ايديك

7- اياك ان تغتر ان الراوند سهل وفاضى وتفتح مواد تانية

الا اذا ... وبقول الا اذا اهو

الا اذا كنت ماشى كويس فى الشرعى وعندك وقت فراغ ...
ساعتها ممكن تفتح حاجة تانية معاه

وانا قولت ازاى نقسم الوقت ونزاكر مادة تانية مع الشرعى

عشان فيه ناس شتت نفسها فى الرمد مع الشرعى ولا خلصوا دة ولا خلصوا دة

أخيرا وليس آخرا ...

الشرعى مادة لذيذة جدا ومزاكرتها بس بتبقى مملة احيانا خصوصا لو تراكمت عليك

حاول تمشى معاهم
صورة

العودة إلى orientation

الموجودون الآن

المستخدمون المتصفحون لهذا المنتدى: لا يوجد أعضاء مسجلين متصلين و 1 زائر

cron